საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო

პრესრელიზები

შოთა რეხვიაშვილმა დევნილთა განსახლების ახალ პროექტებთან დაკავშირებით ბრიფინგი გამართა


2018-02-05 14:42:00

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო, დევნილთა გრძელვადიანი საცხოვრებლით უზრუნველყოფის პროგრამის ფარგლებში აცხადებს ბაზრის კვლევას როგორც დასრულებული (ექსპლოატაციაში მიღებული), ისე მშენებარე ბინების შესყიდვაზე მთელი საქართველოს მასშტაბით.

აღნიშნულ თემასთან დაკავშირებით, დევნილთა და განსახლების მინისტრის მოადგილემ შოთა რეხვიაშვილმა ბრიფინგი გამართა.

მინისტრის მოადგილის განცხადებით, პრიორიტეტი მიენიჭება ყველა იმ სამშენებლო კომპანიას, რომელიც წარმოადგენს დაბალ ფასს და ბინების მოწოდებას უმოკლეს ვადებში განახორციელებს. ასევე, უპირატესობა მიენიჭება 2 და 3-ოთახიან ბინებს. რეაბილიტირებულ შენობების საკითხს კი სამინისტრო არ განიხილავს.

განაცხადების მიღება 2018 წლის 25 იანვარს დაიწყო და ის 10 თებერვლამდე გაგრძელდება. მიუხედავად იმისა, რომ აღნიშნული ინფორმაცია აიტვირთა სამინისტროს ვებგვერდზე, სამინისტრომ მაინც მიმართა მენაშენეთა ასოციაციას, რომელიც 45-მდე სამშენებლო კომპანიას აერთიანებს და მათგან არაერთი საინტერესო წინადადება მიიღო.

გამომდინარე იქიდან, რომ წარმოდგენილი ვადები იწურება, დევნილთა სამინისტრო კიდევ ერთხელ მოუწოდებს სამშენებლო კომპანიებს, გააქტიურდნენ და შემოიტანონ განაცხადები.

დევნილთა და განსახლების მინისტრის მოადგილემ შოთა რეხვიაშვილმა ე.წ იპოთეკური სესხის დაფარვის წარმატებული პროექტის შესახებაც ისაუბრა.

გრძელვადიანი საცხოვრებელი ფართით უზრუნველყოფის მიზნით, სახელმწიფოს მიერ ერთჯერადი ფულადი დახმარება გაიცემა იმ დევნილ ოჯახებზე, რომლებსაც 2018 წლის პირველ იანვრამდე, იპოთეკური სესხით შეძენილი აქვთ სახლი/ბინა და აღნიშნული წარმოადგენს ოჯახის ერთადერთ საკუთრებას.

იპოთეკური სესხის დაფარვისათვის ფულადი დახმარების მაქსიმალური ოდენობა ერთ ოჯახზე 20 000 ლარს შეადგენს. ამ ეტაპზე, დევნილთა და განსახლების სამინისტრო სესხს 100 დევნილ ოჯახს დაუფარავს. განცხადების მიღება 10 იანვარს დაიწო და 12 თებერვლამდე გაგრძელდება. ამიტომ სამინისტრო კიდევ ერთხელ მოუწოდებს დევნილებს გააქტიურდნენ და შეავსონ განაცხადები. პროექტი საქართველოს მასშტაბით ხორციელდება.

ამ პროექტებთან დაკავშირებული ნებისმიერი ინფორმაციის მოძიება შეიძლება სამინისტროს ვებ-გვერდზე www.mra.gov.ge  

იხილეთ ვიდეო - სამინისტრო დევნილი ოჯახებისთვის სამშენებლო კომპანიებისგან ბინებს შეისყიდის

იხილეთ ვიდეო - სამინისტრო იპოთეკურ სესხს 100 დევნილ ოჯახს დაუფარავს